As contas da Seguridade Social rexistraron nos nove primeiros meses do ano un superávit de 5.105,43 millóns de euros, o 0,47% do PIB, o que supón unha caída do 46,1% respecto ao saldo positivo de 9.476,34 millóns do mesmo período de 2010, informou o Ministerio de Traballo.
 
De acordo cos datos de execución presupostaria da Seguridade Social ata setembro, este resultado débese á diferenza entre uns ingresos por valor de 90.770,04 millóns de euros, o 2,90% menos que hai un ano, e uns gastos de 85.664,61 millóns, o 1,98% máis.
 
Do gasto total da Seguridade Social, 79.241,97 millóns (92,50%) correspóndense coas prestacións económicas a familias e institucións, dos que 76.533,67 millóns foron para o pagamento de pensións e prestacións contributivas, o 4,06% máis que un ano antes.
 
Ademais, a Seguridade Social contaba ata setembro cuns gastos previstos pendentes de imputación presupostaria de 900 millóns, co que o superávit ata esa data sería algo menor ao contabilizado.
 
O secretario de Estado da Seguridade Social, Octavio Granado, asegurou nun comunicado que se pechará o exercicio en superávit (do 0,4% é a previsión do Goberno), a pesar de que nesta época de crise se está a facer fronte a gastos para atender ás familias máis vulnerables e ás persoas que teñen máis necesidade.
 
Granado destacou, así mesmo, que o superávit se conseguirá no cuarto ano dunha crise económica "tan dura" debido a que o comportamento do sistema público de pensións español é "moito mellor" que o doutros países do ámbito.
 
Dentro das prestacións contributivas, ás pensións (invalidez, xubilación, viuvez, orfandade e en favor de familiares) destináronse 70.654,72 millóns de euros, un 4,99% máis que no mesmo período do ano pasado.
 
As prestacións por maternidade, paternidade e risco durante o embarazo eleváronse ata 1.737,05 millóns de euros, o que representa un crecemento interanual do 2,04%.
 
En Incapacidade Temporal o gasto rexistrado foi de 3.736,98 millóns de euros, o 9,59% menos respecto a hai un ano.
 
As pensións e prestacións non contributivas caeron o 1,99%, ata os 2.708,30 millóns.
 
Dos ingresos non financeiros, as cotizacións sociais supuxeron 78.231,75 millóns, o 1,18% menos que hai un ano, o que se debeu a unha caída do 7,29% da cotización dos parados.
 
Para o conxunto do ano, o sistema prevé ingresar 110.447,12 millóns por este concepto, co que ata setembro xa se recadara o 70,83% do total.