O pasado día 11 finalizou sen acordo o período de consultas entre o comité de empresa de Emesa e a dirección da empresa de Coirós sobre o cuarto Expediente de Regulación de Emprego de suspensión que presenta a compañía do grupo Isolux Corsán, que afectará a 93 traballadores. Mentres a Consellería de Traballo tramita o expediente, os representantes dos traballadores volveron saír á rúa para protestar e esixir á Xunta "unha maior implicación" cos empregados. "De aprobarse este cuarto ERE, sumaremos xa dous anos de regulación", explica o presidente do comité de empresa, Andrés Rodríguez, quen recorda que moitos "irán" ao paro" "coas prestacións xa esgotadas".
 
Para o persoal, a "complicada situación laboral non é casual", responde, na súa opinión, a un progresivo desmantelamento de Emesa por parte do grupo Isolux, ao que acusa de "externalizar traballos que ata hai pouco se realizaban en Coirós". Por iso, o comité de empresa solicita á responsable de Traballo, Beatriz Mato, que mire "con lupa" o cuarto expediente e que o desestime "polas mentiras sobre a carga de traballo en anteriores ERE e a falta de documentación neste último".
 
Os traballadores, que protestaron diante da delegación da Xunta na Coruña, volveron pedir por escrito unha reunión con Mato e criticaron "a falta de respecto da Xunta" por permitir 14 despedimentos durante a negociación do ERE. "Un venres o director xeral de Relacións Laborais afirma no Parlamento que non vai permitir despedimentos e o luns seguinte a empresa bota á rúa 14 empregados sen que a Consellería tome cartas no asunto", declara Rodríguez.
 
Desde aquí queremos amosar a nosa solidariedade cos traballadores de EMESA e cos de todas as empresas en situación semellante.