A crise do sistema económico puxo en primeiro plano a brecha entre a sociedade e os representantes políticos. A autonomía dos cargos electos respecto ao corpo electoral derivou cara a un sistema de cooptación e aclamación por parte de grandes máquinas políticas servidoras de intereses estraños á sociedade: débeda, bancos, finanzas. Por primeira vez, unha inmensa maioría de cidadáns senten que os seus intereses non teñen que ver coas decisións que toman as institucións, cando non son frontalmente atacados por elas. As reformas do sistema electoral e do sistema político que parece que servirían para corrixir e facer funcionar esta democracia formal, son aprazadas e desprázase da axenda dos políticos.
 
“Non nos representan", dicimos, e eles respóndennos "Non hai outro sistema mellor". Hai que resignarse ás insuficiencias da democracia representativa?
 
Seguro que non. A democracia participativa aspira a introducir espazos públicos de influencia e participación nos que a interacción entre cidadáns e representantes se aproxime máis ao "nós decidimos" dunha democracia directa que ao mero "eu voto" dunha democracia formal representativa.
 
Por todo isto o 15M, Rede de Asembleas de Barrios e Vilas, convídavos a escoitar, reflexionar e falar sobre iso o próximo día 28 de outubro, no Salón de Actos da Real Academia Galega.