No conxunto do estado, os prezos subiron dúas décimas no noveno mes do ano, arrastrados polo fin das rebaixas de verán, mentres que a taxa interanual se elevou unha décima e situou o Índice de Prezos de Consumo (IPC) no 3,1%, tras catro meses de descensos.
 
En Galicia, o maior aumento experimentárono en setembro o vestido e o calzado -cunha suba do 4%- e as bebidas alcohólicas e o tabaco, que aumentaron 3,2%. En cambio, baixaron un 2,2% o ocio e a cultura e un 1,5% os hoteis, cafés e restaurantes. Ademais, descendeu unha décima o apartado doutros, mentres que o resto das categorías experimentaron leves incrementos. Os alimentos e bebidas non alcohólicas subiron dúas décimas; ao igual que a vivenda e a medicina. O ascenso no caso do enxoval foi do 0,3%; no do transporte, do 0,6%; no das comunicacións, do 0,1%, e no ensino, do 1,1%.
 
En canto á comparación interanual -en relación a setembro de 2010-, as subas máis acusadas foron as da vivenda, cun 9,2%; as bebidas alcohólicas e o tabaco, cun 8,4%, e o transporte (un 7,7%). Tamén subiron os alimentos e bebidas non alcohólicas (un 2,8%); o enxoval (un 1,5%); o ensino (un 2,4%); os hoteis, cafés e restaurantes (un 2%) e o apartado doutros (un 2,3%).
 
A Coruña é a provincia galega na que máis subiron os prezos, catro décimas en comparación con agosto e un 3,6% máis que hai un ano. En Lugo aumentaron tres décimas, en Ourense, catro, e tres en Pontevedra.