A taxa de paro mantívose estable no 8,2% da poboación activa no conxunto da OCDE, mentres que o aumento dunha décima en España ata o 21,2% aumentou a diferenza coa media do mundo desenvolvido do que é con vantaxe o país con peores cifras.
 
A Organización para a Cooperación e o Desenvolvemento Económico (OCDE) destacou ao presentar as cifras de agosto que o nivel de paro nos seus 34 países membros se mantivo sen cambios nos oito primeiros meses do ano e no caso da zona euro dende maio no 10%.

En agosto o maior incremento relativo produciuse en Australia, cun aumento de dúas décimas pero ata unha taxa relativamente reducida, do 5,3%.
 
Houbo tamén ascensos dunha décima en Canadá (ao 7,3%), Francia (ao 9,9%), Luxemburgo (ao 4,9%), Eslovaquia (ao 13,4%), en Suecia (ao 7,4%) e a xa citada de España.
 
E non hai datos recentes dunha serie de países entre os que figura Grecia: a súa última estatística harmonizada corresponde a xuño cunha taxa de paro do 16,7%.
 
Pola contra, reduciuse o desemprego durante ese mes en Corea do Sur (dúas décimas ao 3,1%), Hungría (tres décimas ao 10,3%) e Xapón (catro décimas ao 4,3%).
 
En canto á evolución interanual, a máis negativa ata agosto en termos relativos foi a de Irlanda cunha suba do paro de nove décimas (ata o 14,6%), seguida da do estado español (oito décimas ao referido 21,2%) e da de Eslovenia (cinco décimas ao 7,8%).
 
Uns 44,3 millóns de persoas buscaban un emprego na OCDE en agosto, o que significa 2,3 millóns menos que un ano antes, pero aínda 10,4 millóns máis que no mesmo mes de 2008, antes de que os efectos da crise se fixesen notar de cheo no mercado de traballo.