O pagamento, que superou os catro millóns de euros, realizouse o 15 de marzo, cando xa se barruntaba que non sairía adiante a fusión, algo que se materializou dúas semanas despois. As razóns eran, entre outras, que se achara un burato de 1.340 millóns nas finanzas da caixa, ao que había que sumar o déficit de solvencia que xa se coñecía, que ascendía 1.447 millóns.
 
Un membro do consello de administración acusa o xesto de "saqueo"
 
Un dos membros daquel consello de administración da CAM, que non quixo facer pública a súa identidade, criticou onte este pagamento en declaracións a La Sexta. O conselleiro declarou que durante os meses anteriores á intervención por parte do Banco de España que en xullo substituíu os xestores e administradores houbo un "saqueo" da caixa e que con decisións como as pagas extraordinarias e as prexubilacións "se levaban o patrimonio da CAM".
 
"A tal extremo chegou, que creo que foi en marzo ou abril, por cumprimento de obxectivos, (abonouse) unha paga máis, ademais das 22 que cobraban. Ou sexa, unha paga máis por cumprimento de obxectivos", afirmou. Segundo se desprende das súas declaracións, o conselleiro achaca aos directivos da CAM a decisión de autorizar ese ingreso extra en función dos beneficios da caixa, malia que eran estes mesmos xestores os que, afirma, "indubidablemente" maquillaban as contas da entidade.
 
O mesmo conselleiro exculpa de todos estes supostos amaños ao consello de administración do que el formaba parte porque, segundo explica, lles era imposible controlar o "tremendo volume" da CAM.
 
Malia as afirmacións do exconselleiro, fontes coñecedoras dese pagamento aseguran que a decisión que foi moi discutida na entidade e ata reprochada dende os seus socios de fusión naquel momento de aboar unha paga de beneficios (e non de obxectivos como asegurou o exconselleiro) pasou polo consello de administración. E neste órgano de goberno hai cinco representantes da Generalitat valenciana que, como o resto, poderían telo parado. Trátase de Modesto Crespo, Armando Sala, Pere Joan Devesa, José Enrique Garrigós e Rosa Ana Perán, todos eles propostos polo PP.
 
No momento do pagamento, a caixa estaba tecnicamente en beneficios, pero non cumprira ningún dos seus obxectivos do ano anterior. Outras entidades, como Cajastur, malia estar en beneficios e cumprir os obxectivos, reduciron no último ano o variable dos seus empregados e, sobre todo, dos directivos.
 
Prexubilacións millonarias
 
O conselleiro entrevistado por La Sexta deu onte tamén detalles sobre o plan de prexubilacións que a CAM deseñou para alixeirar o seu persoal. Revelou que custan, en total uns 300 millóns. Nese mesmo momento, asegurou, o "capital neto da CAM" era de 500 millóns, polo que cualificou a operación de "animalada". Os voceiros da CAM declinaron onte confirmar estas afirmacións.
 
O plan, que segue adiante, afectará a 973 traballadores da caixa. Ata o pasado mes de xuño, fixéronse efectivas 266 prexubilacións, que de momento custaron 57,9 millóns. Seguindo a mesma media, o custo total serían 212 millóns. Son 218.000 euros de media por empregado.
 
Por outra parte, BMN empeza hoxe a comercializar as obrigas convertibles en accións coas que pretende lograr que un 20% do seu capital estea en mans privadas. Venderanse entre investidores profesionais (empresas) e institucionais e o obxectivo é captar 230 millóns. Mentres, segue esperando a oferta vinculante de tres grandes fondos de investimento, que poderían entrar na entidade cunha ampliación ou coas convertibles.
 
Liberbank, a outra entidade que recibiu unha prórroga do Banco de España, negocia a venda dalgunhas participacións antes do 25 de outubro, o prazo límite dado polo supervisor. En caso de non o lograr, acudirá ao FROB, aínda que o investimento público se limitaría a un máximo de 100 millóns.