A administración pública da que A Universidade forma parte, é para eses capitalistas e especuladores un espazo máis de negocio, corresponde e no seu proxecto, está a súa progresiva privatización construíndo un espazo de ensino superior para adiñeirados e outro absolutamente precarizado onde teríamos cabida as clases populares.
 
Este deseño xa comezou a andar na UDC, a privatización, a pequena escala, xa está introducida desde fai anos, ETT’s, externalización de servizos, a explotación laboral a través de bolsas… son exemplos do tipo das relacións laborais que se practican nesta institución.
 
Agora, fundamentándose na situación de crise, dáse un paso máis nese camiño cara a privatización total. A residencia universitaria, reclamada desde fai anos polo alumnado vaise levar adiante pero polo novo procedemento instaurado desde a Xunta de construción e xestión privada, o que repercutirá directamente nos petos dos alumnos/as e/ou na calidade do servizo, non podemos esquecer que o capital inviste onde hai negocio e o negocio deriva desas dúas condicións sinaladas.
 
A Conferencia de Reitores informou, na súa última reunión, de que se agarda unha redución orzamentaria para o ensino superior o vindeiro ano do 16%, mesmo agora hai universidades do estado que xa non teñen diñeiro para pagar aos seus traballadores, cunha redución das proporcións indicadas é evidente que se recortarán investimentos, reducirase o persoal, tanto docente coma de servizos o que, á súa vez, repercutirá directamente na calidade do ensino.
 
Por outro lado o incremento das taxas universitarias (este ano, cun paro que rolda os 5 millóns de persoas ese incremento foi do 3,6%) e a nova fórmula  de bolsas, instaurada pola entrada en Boloña, de créditos reintegrables, fan que a Universidade se alonxe progresivamente das clases con menos capacidade económica, construíndose dun xeito progresivo a universidade de elite que desde as esferas máis reaccionarias veñen reclamando desde sempre, total para que imos estudar unha carreira se o noso futuro é engrosar a xa enorme ringleira do paro?
 
A universidade non é gratuíta, finánciase cun sistema de copago semellante ao que agora se quere instaurar na sanidade, o que se pretende é aproximar paulatinamente o que o alumno/a paga en concepto de taxas ao custo real da súa formación provocando un radical impedimento para que os colectivos máis desfavorecidos poidan acceder ao ensino superior.
 
Este é o futuro que teñen previsto para a Universidade Pública, nas mans de todos está que non o consigan a indignación que levou a miles de persoas a saír e permanecer na rúa desde o 15M ten que estenderse á Universidade.
 
Animámosvos a que vos organicedes neste movemento cívico, apartidista pero non apolítico que pretende articular ese descontento latente e darlle unha vía de expresión.
 
Tamén vos chamamos a participar activamente nos actos que, desde as 12 da mañá desenvolveremos, o día 15, na Praza de Pontevedra e a participar na manifestación que, desde este mesmo lugar, sairá en reivindicación dun cambio global, por unha saída social á crise e contra o neoliberalismo.