A nós parécenos un feito moi grave, do que esixiremos responsabilidades no vindeiro Consello de Goberno. Non entendemos como a Universidade recorre ao incumprimento da lei dun xeito consciente. Quén se fará cargo das consecuencias económicas, se as houber, derivadas deste acto?.
 
De verificarse o comportamento denunciado na prensa atoparémonos diante dun acto que é legalmente perseguible e eticamente inaceptable, a Universidade que se enche a boca, cando quere, reclamando a legalidade vixente incúmprea cando lle convén.
 
Non lle chega á UDC con ser a última das universidades galegas nos rankings, nin dar conseguido o “título” excelencia internacional ao que se ven presentando os últimos anos. Conseguirán estes “magníficos” xestores que a nosa universidade pase á historia coma unha universidade que non é de fiar. Magnífico título que nos deixarán.
 
"A Universidade non vai parar porque as administracións que se comprometeron a realizar expropiacións para a institución académica non fixesen ningunha dende hai oito anos", argumenta o vicereitor de Infraestruturas e Xestión Ambiental para xustificar a construción do edificio sen licenza e sen esperar sequera á entrada en vigor do plan que a ampararía. "A Consellería de Educación e o Concello marxínannos constantemente e, se non temos solares, temos que levar a cabo nosas propias estratexias", lamenta Martínez, que recoñece non ter solicitado o permiso de obra ao Goberno local " porque non o ía conceder".
 
Pois vaia xustificación. Ao sr. vicerreitor parecen non preocuparlle os efectos da ilegalidade realizada, a nós si. O que se detrae da noticia aparecida na prensa é que pase o que pase,de momento o edificio está executado e recepcionado. Se este é o xeito de actuar do equipo reitoral, nós non o compartimos.
 
A cousa non queda aí, a prepotencia do sr. vicerreitor non ten limite, indica agora que si a Xunta non expropia e non se conceden as licenzas, a Universidade seguira edificando de xeito ilegal.  Para que logo digan que non hai cartos.