É "urxente", segundo Merkel. Como xa saberán, recapitalizar é o tecnicismo de despiste que usan para non dicir "meter diñeiro", pois diso se trata: destinar centos de miles de millóns de diñeiro público. Pero ademais, está mal empregado, pois non sería unha recapitalización, senón dunha requetecapitalización, posto que será a segunda recapitalización masiva da banca europea.
 
A primeira, se recordan, fíxose en 2008, hai xusto tres anos. Dende entón son 25 os bancos rescatados, e outros 11 foron liquidados. Segundo o comisario Almunia, agora barállase rescatar 21 bancos, aínda que o número é provisional, e seguramente será maior. Saiban que entre recapitalizacións e garantías nos fundimos xa 4,6 billóns (con b de banco). Repitan a cifra en voz alta, e en pesetas, que custa crelo: case 800 billóns (con b de bandido) das vellas pesetas.
 
Dos bancos que agora necesitan diñeiro, moitos non serán recapitalizados, senón requetecapitalizados, pois será o seu segundo rescate. É o caso do primeiro en caer, Dexia. En 2008 Francia, Bélxica e Luxemburgo arrimaron 6.500 millóns que xa non recuperarán, e agora ademais terán que comer os 95.000 millóns de activos tóxicos que necesitan saneamento.
 
Segundo o FMI, Europa deberá inxectar outra vez á banca non menos de 200.000 millóns. E de onde sacarán os países ese diñeiral, axustados como andamos? Pois xa teñen solución: en boa parte collerano do fondo europeo de rescate, ese que acaba de ampliarse, e que criamos que era para salvar a Grecia, e resulta que non: no cumio de xullo meteron na letra pequena a posibilidade de que o fondo sirva tamén para recapitalizar bancos en apuros.
 
En fin, o que xa sabiamos: que o chaman rescate de Grecia cando en verdade queren dicir rescate da banca. Ese é o verdadeiro problema da zona euro. Porque se unha economía pequena como a grega é capaz de desestabilizar todo o sistema financeiro, o problema non é Grecia, senón que ese sistema está podre de raíz. E se despois de limpar os bancos de activos tóxicos en 2008, volveron acumular lixo, o tóxico non son os activos senón o propio sistema financeiro. E esa toxicidade non se vai quitar por moito diñeiro que sigamos queimando.