O desemprego aumentou un 3,71% respecto ao mes de agosto debido á fin da tempada estival (o 63% dos novos demandantes de emprego proceden do sector servizos) e aos recortes de emprego público, segundo o Goberno e os sindicatos. A nivel nacional, o paro tamén experimentou o seu peor dato en 15 anos, ao crecer en 95.817 persoas, ata os 4.226.744 parados (+2,32%).
 
Galicia foi a quinta comunidade onde máis aumentou o paro en setembro en termos relativos, só por detrás de Baleares, Cantabria e Extremadura. O groso dos novos parados achegouno a provincia de Pontevedra, que xerou 3.752 desempregados en setembro (o 45% do total), un 4,2% máis que en agosto. Ségueno A Coruña, con 2.564 novos parados (+2,85%); Lugo, con 1.361 (+6,49%), e Ourense, con 659 inscritos (+2,7%).
 
Si se comparan os datos cos de 2010, a suba foi do 10% en Pontevedra, que sumou 8.535 parados e acumula un total de 93.104; do 7,8% en Lugo, que con 1.615 persoas máis alcanza os 22.320 desempregados; do 6,42% na Coruña (5.586 parados máis, ata os 92.540) e do 4,55% en Ourense, que alcanza as 24.954 persoas tras agregar 1.087 no último ano.
 
O dato de setembro de Galicia é o peor dende 1996 en termos absolutos, cando o paro crecera en 4.700 persoas fronte a agosto daquel ano. Por sectores, o dos servizos é o que rexistra un maior número de demandantes de emprego. De feito, con 126.315 representa un 54,23% do total de desempregados da comunidade. O aumento en setembro foi de 5.281 persoas respecto ao mes de agosto, un 63% máis.
 
Ademais, sumáronse 1.450 desempregados ás listas da industria, que alcanza un total de 36.015; mentres que son 1.108 na construción (37.792 en total); 322 na agricultura (en total son 6.028) e 175 no colectivo sen emprego anterior (este crece ata os 26.768).
 
O vicepresidente económico do Goberno, Elena Salgado, achacou o repunte do desemprego aos recortes en servizos públicos, como a sanidade e a educación, efectuados nalgunhas autonomías. O titular de Economía tamén admitiu que as perspectivas para o que resta de ano tampouco son boas.
 
De feito, o Goberno deu por desmanteladas onte as súas previsións de pechar 2011 coa creación de 40.000 ou 50.000 empregos netos, como admitiu o ministro de Traballo: "Teño a impresión, á luz destas cifras de setembro, por como se está a comportar o conxunto dos indicadores na última parte do verán, de que o último trimestre vai ser peor do que prevía o Executivo", recoñeceu Valeriano Gómez, que tamén prognosticou unha maior destrución de postos de emprego no conxunto de países europeos polas políticas de axuste fiscal "tan necesarias".
 
A directora xeral de Formación e Colocación da Xunta, Ana María Díaz, atribuíu o dato "negativo" do paro en Galicia á finalización dos contratos estivais no sector servizos, e recordou que setembro é un mes no que "tradicionalmente sobe o número de parados".
 
Contra esta situación só cabe unha acción, a mobilización. Esta nosa alternativa vímola reclamando desde fai tempo sen que os sindicatos con capacidade para a convocatoria doutra folga xeral reaccionen. Que non sexa sen a nosa oposición!-
 
FAI FALTA OUTRA FOLGA XERAL!!