A pesar de que a crise obrigou as familias a recortar gastos, cada vez son máis os galegos que deciden custearse un seguro sanitario. En Galicia un de cada seis cidadáns xa ten cobertura médica privada, un total de 449.213 persoas, unha cifra que ademais se incrementou en 2010 nun 2,37% con respecto ao exercicio anterior. Isto significa que en só un ano máis de 10.600 galegos subscribiron pólizas médicas para evitar ter que ir pola Seguridade Social cando teñen algún problema de saúde. Os axentes de seguros apuntan que un dos motivos que alegan as familias cando solicitan un seguro privado é o temor a posibles recortes na sanidade pública ou privatizacións.
 
A crise obrigou aos gobernos a axustar os seus presupostos e recortar gastos, o que se suma ás dúbidas sobre a sostibilidade dun sistema sanitario que, en concreto, no caso de Galicia resulta cada vez máis custoso polo envellecemento da poboación galega que encarece os tratamentos e dispara a factura farmacéutica. O propio presidente da Xunta, Alberto Núñez Feijóo, alertou de que a sanidade española ten unha débeda oculta de 15.000 millóns de euros e necesita refinanciarse para garantir a súa viabilidade futura.
 
Onde primeiro atacaron as administracións foi ao gasto farmacéutico. En Galicia aprobouse un catálogo de fármacos, que agora queda superado pola orde do Ministerio de Sanidade de receitar por principio activo. Pero os axustes poderían ir máis alá. Nalgunhas comunidades autónomas como Cataluña están a pechar quirófanos e centros de saúde por falta de presuposto. Pero ademais abriuse o debate sobre o copagamento na sanidade e a posibilidade dunha privatización encuberta dalgúns hospitais.
 
Neste contexto moitos galegos decidiron asegurar a súa cobertura sanitaria cunha póliza privada, tal e como aseguran algúns dos axentes de seguros consultados. Segundo os datos de Icea -Investigación Cooperativa entre Entidades Aseguradoras-, na comunidade galega non só creceu en 10.646 o número de asegurados senón que tamén incrementouse o volume de primas nun 4 por cento situándose en 2010 nun total de 250 millóns de euros.
 
"A xente está preocupada, hai inseguridade pola posibilidade de recortes ou de privatizacións. No último ano empezamos a notar esa inquietud",explica un dos axentes de seguros consultados por este xornal. Pero non é a única razón. Este temor pola situación da sanidade pública súmase aos argumentos que tradicionalmente viñan alegando xa os clientes da sanidade privada: as listas de espera.
 
"En xeral o que vai a un seguro privado é porque quere ser atendido coma se se tratase dunha autoestrada e non dunha estrada", explican dende a patronal de empresas aseguradoras de España, Unespa.
 
O feito de que cada vez haxa máis galegos subscritos a un seguro privado de sanidade tampouco significa que a rede sanitaria pública estea a perder prestixio. De feito, tanto Unespa coma os axentes de seguros aclaran que as persoas que contratan unha póliza privada non se queixan da atención recibida ata o momento nos centros públicos senón que máis ben están temerosos polo futuro, pola posibilidade de que se lle recorten prestacións, e buscan ademais ser atendidos de forma máis rápida, sen listas de espera.
 
No barómetro que cada ano elabora o Ministerio de Sanidade quedan claros os motivos que empurran os galegos a subscribir unha póliza privada. Seis de cada dez enquisados asegura que acudiría a un centro privado para ser atendido máis rápido. Pola contra, prefiren a rede pública cando se trata de valorar a capacitación dos médicos, o trato persoal ou mesmo o confort das instalacións.
 
O medo, non obstante, de moitos galegos é que estas prestacións que ata agora valoraban positivamente rematen véndose deterioradas polos recortes presupostarios que se lles impoñen ás administracións.