O desemprego na zona euro durante o pasado mes de agosto mantívose estable respecto a xullo no 10%, aínda que supón dúas décimas menos que no mesmo mes o ano anterior, co estado español novamente á cabeza cunha taxa de paro do 21,2%, unha décima máis que en xullo, segundo informou Eurostat.
 
Pola súa banda, no conxunto da Unión Europea (UE) a taxa de desemprego situouse no 9,5%, tamén sen cambios respecto ao mes de xullo pero unha décima menos que o ano anterior.
 
A axencia estatística europea calcula que 22,785 millóns de persoas carecían de emprego na UE, dos que 15,739 millóns se encontraban na zona euro, o que supón un descenso mensual de 62.000 parados no conxunto da UE e de 38.000 na zona euro. Respecto a agosto de 2010 a cifra de desempregados entre os Veintisiete baixou en 300.000 persoas e en 215.000 na zona euro.
 
Entre os países membros cuxos datos estaban dispoñibles, as menores taxas de paro rexistráronse en Austria (3,7%), Países Baixos (4,4%) e Luxemburgo (4,9%), mentres que as máis altas foron as do estado español (21,2%), Grecia (16,7% no segundo trimestre de 2011) e Letonia (16,2% no segundo trimestre de 2011).
 
Pola súa banda, a taxa de paro masculino na eurozona baixou unha décima en agosto, ata o 9,6%, e pasou do 9,4% de xullo ao 9,3% na UE, mentres que o desemprego feminino se mantivo sen cambios en ambas as dúas áreas, no 10,3% e o 9,7%, respectivamente.
 
Pola súa banda, a taxa de paro entre os menores de 25 anos baixou ao 20,4% na zona euro, dende o 20,5% do mes anterior, mentres no conxunto da UE se situou no 20,9%, o mesmo nivel que en xullo.
 
Nas tres categorías o estado español volveu rexistrar en abril as cifras máis altas de desemprego cun paro do 46,2% entre os mozos, dúas décimas máis que en marzo, mentres que o desemprego masculino se mantivo estable no 20,8% e o paro feminino subiu unha décima, ata o 21,6%.