O Banco de España deu por finalizado o proceso de recapitalización do sistema financeiro español previsto no Real Decreto-I 2/2011, cuns resultados dantescos para o consumidor: nos últimos seis meses o FROB tivo que inxectar 7.551 millóns de euros e convertéronse en bancos a práctica totalidade das caixas de aforros (ata un 98'3% dos activos do sector). A estas cifra hai que sumarlle os 13.964 millóns de euros que xa gastou o FROB na reordenación das caixas de aforros españolas, que se desenvolveu durante boa parte de 2010.
 
En termos xerais esta última parte do proceso finalizou cunha inxección de capital de 13.389 millóns de euros -os 7.551 procedentes do FROB e outros 5.838 de investidores privados-. Dende 2008 o FROB destinou máis de 21.500 millóns de euros á reestruturación do sistema bancario no noso país. Unha cifra escandalosa que non debe pasar inadvertida.
 
Das 13 entidades que, dende marzo, necesitaban unha ampliación de capital, catro bancos recapitalizaron as súas matrices, dous preferiron saír á bolsa facendo pagar aos consumidores por salvar o seu propio diñeiro -Bankia e Banca Cívica-, dous optaron pola captación de investidores privados -BMN e Liverbank-, tres foron recapitalizadas polo FROB -Novacaixagalicia, Catalunya Caixa e Unnim- e outra cubriu as súas necesidades de capital mediante unha fusión (Caixa EspañaDuero). Ademais, a CAM está intervida polo Banco de España, tras ser substituídos os seus administradores e que recapitaliza o FROB elas.
 
As caixas de aforros, en perigo de extinción
 
A maior parte das caixas de aforros traspasaron a súa actividade financeira a un banco, mesmo moitas das que non estaban obrigadas a facelo. Deste xeito La Caixa, Ibercaja, Bankia, Banca Cívica, Grupo BMN, Liberbank, Unicaja, Caixa España-Douro, Novacaixagalicia, Catalunyacaixa, Unnim, CAM, BBK, Kutxa e Caixa Vital xa operan como bancos, mentres se espera a Caja 3 -SIP de Caixa Inmaculada, Caixa Círculo e Caixa de Badaxoz-, que xa está constituída como banco pero está pendente da aprobación da segregación do seu negocio bancario.
 
O FROB entrou, ademais, no capital de Novacaigalicia (93%), CatalunyaCaixa (90%) e Unnim (100%). Capítulo á parte merece o proceso de adxudicación polo que está a atravesar a CAM, intervida polo Banco de España e que aínda así se ve envolvida en diversos escándalos, como o das indemnizacións pactadas polos seus directivos.
 
Das 45 caixas de aforros existentes antes da reestruturación do sistema financeiro, actualmente só quedan 15. Ademais as entidades fusionadas reduciron o seu persoal nun 16'9% de media, mentres que a súa rede de oficinas minguou nun 17'2%. Unha redución de gastos que, non obstante, non repercutiu positivamente nos consumidores. Ao contrario, as caixas de aforros avanzan cara a un modelo cada vez máis caro e elitista, co desproporcionado aumento das comisións bancarias de ata un 60% dende 2007.
 
É absolutamente inadmisible que a cidadanía continúe pagando polos desmandos da Banca, unha das principais causantes da crise. O Banco de España, suposto supervisor do sistema bancario español, debería determinar responsabilidades para os directivos que levaron a estas caixas de aforros a tan delicada situación económica. A cidadanía non quere, nin debe, seguir pagando os desmandos da Banca.

 ADICAE