Vendo as cifras con que o Estado está intervindo a favor destes que provocaron a crise financeira, parece normal que queiran esfolar vivo ao público da pé. Pero sinceramente, xa que tanto se fala da necesidade de recortes: non debería ser o máis normal que o público se dispuxese a recortar...a banqueiros e demais ralea? Xa non hai dúbidas. Vivimos en época de recortes. Só se discutirá quen manexa as tesoiras.
 
Aínda que estes días Insurgente xa informou sobre a noticia, non estaría mal recoller de forma resumida algúns datos e comentarios aparecidos na prensa francesa sobre a operación de "saneado" da CAM para ofrecerlla á gran banca.
 
A noticia aparece hoxe 20 de setembro en Les Echos (principal diario de economía francés) con titular “L'Espagne va garantir les pertes de la CAM à hauteur de 20 milliards d'euros d'actifs” (España vai garantir as perdas da CAM ata 20 mil millóns de euros.)
 
O xornal comeza dicindo que a factura para salvar á Caixa de Aforros do Mediterráneo (CAM) ameaza con ser aínda máis avultada do previsto. Lles Echos fala de que unha fonte bancaria que tivo acceso ao protocolo de venda da CAM lle confirmou que o Banco de España ofrece ao posible comprador desta caixa un aval de 20 mil millóns de euros ante eventuais perdas. Logo fala do mecanismo que se utilizaría para afrontar as potenciais perdas da CAM. O máis interesante é que se afirma que nunca haberá máis perdas deses 20 mil millóns de euros que o Banco de España garante. Ou sexa, que á gran banca que compre a dita caixa lle sairía redondo o negocio. Todo un exemplo de como os grandes capitáns da economía de mercado asumen os riscos dos que tanto nos falan que hai que asumir para vivir nunha economía libre.
 
É practicamente ao final da noticia, cando o xornal francés fala de que estamos ante un esquema estatal de protección de perdas bancarias sen precedentes en España. Pero polo visto, tal esquema de aval público aínda non "levanta o entusiasmo" de "os tres primeiros bancos españois Santander, BBVA e CaixaBank, [considerados] como os únicos que poden dixerir os 70 mil millóns de euros en activos" que están en xogo.
 
Les Echos recorda as outras tres caixas de aforros que serán reflotadas de aquí ao 30 de setembro: Novacaixagalicia, Unnim e Catalunya Caixa, cunhas necesidades de capital de máis de 4,5 mil millóns de euros. E conclúe dicindo que "contando coa primeira inxección de fondos públicos na CAM, España gastou xa 132 mil millóns de euros nas súas caixas de aforros". (subliñados nosos)
 
O que non fai o xornal francés (e non precisamente por diplomatie) é chamar a posibles lectores do estado español, e de paso tamén a franceses por aquilo de que "cando vexa as barbas do veciño recortar... ", o que non fai o xornal francés, dicimos, é facer un chamamento cargado de razóns para que non nos cortemos un pelo en inundar as rúas coas manifestacións contra os recortes en salarios, condicións laborais, pensións, sanidade, educación, etc. E que vaiamos cada vez a máis ata recortar, sen retorno posible, o poder destes recortadores salvaxes que nos dominan. Nós si o facemos. Ese chamamento. 

Insurgente