O 67% dos cidadáns de entre 18 e 29 anos viven cos seus pais. Así o asegura unha análise que a Fundación "la Caixa" presentou en Madrid. A cifra, que supón máis do dobre da porcentaxe rexistrada nos países escandinavos (30%), enmárcase dentro do seu estudo social número 32, Individualización y Solidaridad Familiar, que afonda nos efectos que a crise económica produciu nas relacións familiares e en comparación con outros países.
 
O traballo foi elaborado polo catedrático do Departamento de Socioloxía da Universidade Autónoma de Madrid, Gerardo Meil, que destacou como principal conclusión o significativo apoio familiar que se mantén en tempos de crise, cando o paro, a quebra ou o afogo das débedas tomaron carta de natureza.
 
Unhas circunstancias polas que o 23% dos cidadáns tivo que doar diñeiro a un familiar co que non convive para axudarlle a sufragar gastos correntes. Na mesma liña, o estudo pon de manifesto que o 33% dos cidadáns que compraron unha vivenda nos últimos anos o fixo coa axuda económica de familiares, principalmente de pais, que lles prestaron diñeiro sen intereses ou avais.
 
Nos últimos anos o 33% das compras de vivenda realizouse co apoio familiar
 
Dos que conseguiron emanciparse, só un 31% vive a máis de cinco quilómetros de distancia dos seus pais, mentres a porcentaxe restante se beneficia das vantaxes que esa proximidade leva consigo. E non son unicamente económicas: o tempo xoga un papel fundamental. Favorece que as familias se axuden, por exemplo, evitando gastos de gardaría ou neneiras.
 
Un exemplo desta situación queda reflectido na porcentaxe de avós que contribúen ao coidado dos seus netos, que creceu máis dun 10% dende 1993. Tamén é significativo que dous de cada tres das familias con nenos menores de tres anos conten co tempo dos avós para sacar adiante os seus fillos.
 
Prestacións sociais
 
O traballo bota luz sobre a importancia que os cidadáns confiren á familia como instrumento de apoio, sobre todo en comparación con outros países, onde recorren máis ás prestacións sociais. Mentres o 32% dos alemáns e o 30% dos franceses consideran que os familiares están no seu deber de contribuír ás súas carencias, en estado español a porcentaxe elévase ao 56% dos entrevistados. 

Público