A decisión, cuestionada con dureza pola oposición debido á actual situación económica, permitiralle cobrar ao mes 1.800 euros netos, aínda que Valladares explica: «Desa cantidade hai que rebaixar entre 400 e 500 euros ao mes de dietas e de quilómetros, que nunca lle pasei ao Concello, cando debido á realización de xestións municipais me desprazo con asiduidade a Ourense ou a Santiago».
 
Unhas explicacións que, non obstante, non convencen en absoluto a oposición. Guillermo Fernández, voceiro socialista, considera «escandalosamente escandalosa» a medida, e José Mosquera, edil nacionalista, vea cando menos «inoportuna». Ambos os dous coinciden en indicar que coa suba (pasará a cobrar 34.004 euros anuais fronte aos 19.800 que percibía, un 70% máis) busca compensar a perda do cargo de deputado provincial, que ocupou durante 12 anos. Unha crítica que o alcalde nega: «Se fose así teríame quedado curto porque na Deputación cobraba máis». Arremeteu ademais contra o edil e secretario comarcal do PSOE xa que cobrará como deputado provincial case tanto como el, despois, di, dun gran fracaso electoral.
 
O rexedor de Cea, un municipio con 2.600 habitantes, cobrará máis da metade do que algúns dos alcaldes das principais cidades galegas -66.881 o de Lugo, 65.220 o da Coruña ou 65.219 o de Vigo- superado, iso si, no rural polo da Merca, que chega a 58.497 con 2.244 habitantes.. 

La Voz de Galicia