Despois de case 4 de anos sen imposto de patrimonio, debido á actuación bochornosa do goberno de Zapatero, na que a súa predilección polas clases máis altas quedou clara, Rubalcaba pide a este que volva instaurar unha medida que se presupón como de esquerdas. Sen querer entrar en guerra con banqueiros, empresarios e grandes fortunas en xeral, os de centro-esquerda pretenden arranxar en dous meses o que non fixeron en 8 anos.
 
Aínda que non se quedan curtos os de centro-dereita, deixando claros o patético e ruín da súa reivindicación. Tal medida, imposta durante o goberno de José María Aznar, foi suprimida (parcialmente non na súa totalidade), no ano 2007 por José Luís Rodríguez Zapatero, e iso que para moitos foi nese mesmo ano cando comezou a crise actual. Será que o do acento texano é todo un ídolo por lares ultradereitistas.
 
Sen entrar practicamente en detalles, pois a confusión no partido é tal que uns falan de 200.00 a 300.000 e outros de 89.000 directamente, dende o PSOE non aclaran a cantos membros oligárquicos afectará tal medida, nin en que contía sufrirán na burguesía o devandito imposto. É complicado realizar nos últimos momentos do mandato medidas populares, cando tes tan ben afeitos aos voitres que devoran en nome do capitalismo. Xorde para moitos a interminable cuestión acerca da intención da medida. As previsións son xenerosas, presúmese recadar 1.400 millóns en 2012 co devandito tributo.
 
Pero como era de esperar, os Amancio Ortega, Francisco González, Emilio Botín e chupa riquezas en xeral, comezaron as súas presións da man do seu partido político, o Partido Popular. E é que parece inconcibible que con Rodrigo Rato na súa cúpula, póidase favorecer o pobo e non os banqueiros. De resolucións convenientes para a maioría nin falar nese ambiente, non vaia ser que o pobo se subleve, e non pagamos máis que eles, non se vaian decatar de que os estamos a explotar e enganamos.
 
Debera ser presuposto pola sociedade (non sendo así) que cada persoa achegaría ao Estado o que ben puidese, dependendo do seu soldo e as súas propiedades. Isto ademais de facer minimamente xusto o sistema fiscal, aumentaría enormemente os ingresos do Estado (sen entrar en previsións a dedo), podendo estimular o crecemento económico. Pero iso non é o mellor, podería ata ter efectos sociais positivos, alegrando un día en varios anos a unha cidadanía cada día máis desesperada.
 
Pero dende núcleos sociais digamos acomodados, representación do PP, empéñanse en facernos crer que coa devandita medida só lograremos mandar o diñeiro fóra do noso país, véxase paraísos fiscais ou algo similar. Se é que dá gusto cando se presupón iso das fortunas do estado, ata eles o admiten. Ou que moitos monopolios económicos do noso país, de recoñecemento e valor internacional, poderían emigrar. Isto último di moito acerca do seu compromiso ético-social. Pero oian, nada que non saibamos.
 
Xa sabemos como vai ser o estado español a partir do día 20 de novembro, se todo sae como teñen previsto. Comandadas por Mariano, personaxes como Cospedal ou Aguirre camparán ás súas anchas, entón os recortes sociais e a desigualdade irán en imparable aumento. Pero amparándose nunha falsa democracia, non teremos réplica aos ollos da sociedade. A culpa é nosa, só a nosa.
 
Antes de que se me esqueza, canto cobra a súa maxestade? Dígoo máis que nada por se chega ao mínimo para o devandito imposto con isto da crise.... 

Kaosnarrede