A taxa de paro entre os países membros da Organización para a Cooperación e o Desenvolvemento Económico (OCDE) mantívose estable en xullo con respecto a xuño no 8,2%, onde se situou por quinto mes consecutivo, segundo informou a organización internacional, que volveu sinalar a España como o país con maior índice de desemprego.
 
A axencia sinala que os datos dos diferentes países membros da OCDE en xullo respecto a xuño rexistraron "moi poucos" movementos. Así, destaca que o maior incremento se rexistrou en Luxemburgo (tres décimas, ata o 4,6%), mentres que a maior caída foi en México (cinco décimas ata o 5,3%).
 
O estado español, onde a taxa de desemprego aumentou en xullo dúas décimas ata o 21,2%, volve rexistrar un mes máis a maior taxa de paro entre os membros da OCDE cuxos datos están dispoñibles seguida de Irlanda (14,5%), Eslovaquia (13,4%) e Portugal (12,3%).
 
Así mesmo, a OCDE tamén subliña que o dato de desemprego na zona euro se mantivo por segundo mes consecutivo no 10%, nivel no que se move a taxa de paro da unión monetaria europea dende decembro de 2010.
 
Por outro lado, adianta que os datos xa coñecidos de desemprego no mes de agosto en Estados Unidos, onde se mantivo estable no 9,1%, e Canadá, onde aumentou unha décima ata o 7,3%, confirman o actual escenario de "ampla estabilidade" nas taxas de paro.
 
Por último, a OCDE apunta que en xullo de 2011 o número de persoas desempregadas nos países membros da institución alcanzou os 44,5 millóns, dous millóns menos que no mesmo mes de 2010, pero 11,4 millóns máis que en xullo de 2008.