O Ministerio de Educación propón que profesores universitarios "con máis experiencia e méritos excepcionais" traballen, de modo voluntario, ata os 75 anos, cinco máis do límite estipulado na actualidade. O departamento educativo do Goberno central está a elaborar un real decreto para que máis profesores maiores poidan seguir exercendo, tendo en conta que as universidades xa contan coa figura do "profesor emérito" para contar cos docentes máis destacados pola súa traxectoria traspasando a idade de xubilación.
 
Este artigo do borrador colleu "de sorpresa" ás universidades, polo menos ás tres galegas, que descoñecían esta medida e aseguran que non foron consultadas nin para o seu debate nin para a súa posta en marcha. Esta disposición aparece, segundo as institucións académicas de Galicia, na Lei de Acompañamento da Lei de Economía Sostible aprobada no Parlamento e publicada no BOE do 12 de marzo deste ano.
 
"O Goberno, logo de informe das comunidades autónomas e do Consello de Universidades, promoverá a posta en marcha, no curso dos próximos seis meses, de mecanismos que faciliten a prolongación no servizo activo, por un período máximo de cinco anos adicionais, dos funcionarios pertencentes aos corpos docentes universitarios e profesores de investigación do CSIC nos que concorran méritos excepcionais". Así consta exactamente na lei complementaria.
 
A maioría das comunidades autónomas mostraron onte o seu rexeitamento ao real decreto de acceso á función pública que prepara o Ministerio, na reunión da Comisión Xeral de Educación. Só Andalucía o apoia. O resto cuestionou "a idoneidade do momento" político para aprobar o real decreto.
 
Mentres que a propia disposición inclúe que "existe un informe previo" das comunidades autónomas e do Consello de Universidades, as institucións galegas negan que houbese un debate sobre este tema e aseguran descoñecer os méritos que se esixirán aos docentes para atrasar cinco anos a súa xubilación e seguir exercendo. Segundo o borrador, os profesores que queiran continuar impartindo clase deberán acreditar nove distincións, entre méritos docentes (quinquenios) e de investigación (sexenios). No caso dos profesores de investigación do CSIC, o requisito ascenderá a doce recoñecementos, segundo o texto inicial que prevé converterse en real decreto.