O expresidente da patronal CEOE, Gerardo Díaz Ferrán, só será xulgado por fraude fiscal no caso que leva a Audiencia Nacional sobre a privatización e venda de Aeroliñas Arxentinas en 2001 ao grupo turístico controlado polo empresario xunto ao seu socio, Conzalo Pascual, e Antonio Mata. Na fase previa de instrución, o tribunal observa un delito contra a Facenda Pública valorado en 100 millóns de euros. Pola contra, arquiva o resto de cargos presentados contra os acusados.
 
Durante a privatización da compañía área arxentina, a Sociedade Estatal de Participacións Industriais (SEPI) vendeu por un euro o 92% da empresa a Air Comet, a aeroliña ligada accionarialmente ao extinto grupo Marsans e que era propiedade de Díaz Ferrán, Pascual e Mata. Para facilitar a operación, a entidade pública realizou unha achega de 300 millóns de euros para amortizar parte da débeda de Aeroliñas Arxentinas, que ascendía a un total de 1.200 millóns, que segundo o xuíz é o capital que os denunciados non regularizaron con Facenda.
 
A denuncia contra Antonio Mata, Gonzalo Pascual, antigo presidente de Spanair, e Díaz Ferrán, quen tivo que abandonar a presidencia da CEOE tras a grave crise que acabou coa súa armazón empresarial, foi interposta por Roberto Pérez Badiola.
 
Para que un acusado de fraude vaia ao cárcere ten que existir un delito continuado contra a Facenda Pública pero non se prevé prisión en caso de que se trate dunha soa operación, como acontece neste caso, independientemte da cantidade defraudada.
 
Sobre Díaz Ferrán e Gonzalo Pascual pesa un embargo de 424 millóns pola quebra de Marsans, xa que segundo defendeu entón o xuíz que leva o caso hai indicios de que se lles declare culpables do concurso e tamén "evidencia" de que non haberá recursos para pagar os acredores do grupo turístico. Ademais, o propio Díaz Ferrán está en quebra persoal e non goza da administración dos seus bens por decisión do Xulgado do Mercantil número 5 de Madrid.