Galicia é a comunidade na que menos adultos deciden retomar os seus estudos malia tratarse da autonomía coa poboación menos formada de todo o Estado xa que catro de cada dez galegos son analfabetos ou só remataron o equivalente a Educación Primaria -a porcentaxe máis alta de todo o país e dez puntos por enriba da media estatal -, segundo a Enquisa de condicións de vida 2009, do Instituto Nacional de Estatística (INE). Tras ela, Castela La Mancha, Castela e León ou Andalucía son as comunidades na que menos cidadáns superaron Primaria, cun 36, 36,6 e 34,6%, respectivamente. No lado contrario, Cantabria (só un 15%) e o País Vasco (17,8%).
 
A situación dá un xiro se se analizan os datos de adultos que contan co primeiro ciclo de Secundaria -1 º e 2º curso, o equivalente ao antigo sétimo e oitavo de EGB- rematado. Nesta situación encóntrase o 19,9% da poboación galega, o que sitúa a Galicia como a terceira con menor número de cidadáns que conta con esta formación académica e cinco puntos por debaixo da media estatal. No caso da segunda etapa de Secundaria a porcentaxe baixa o 18,2% e a comunidade sitúase en sexto lugar pola cola.
 
O informe do INE tamén analiza o número de adultos que contan cun título universitario ou dun ciclo superior de FP no seu particular curriculum profesional. Nesta situación encóntranse un de cada catro galegos adultos (o 22%), dous puntos por debaixo da media estatal (24%), o que sitúa a comunidade galega como a sétima con maior porcentaxe de poboación que cursou estes estudos. País Vasco é a autonomía con maior taxa de licenciados (o 39% da poboación conta con estes estudos) e Murcia a que menos (16%).